காத்திருக்க நேரமில்லை

நம்மில் யாருக்கும்
காத்திருக்க நேரமில்லை
உண்மையில்
நாம் யாரும் காத்திருக்க விரும்புவதில்லை..
காதலிக்கும் போதும்
காதலிக்கப்படும் போதும் தவிர..
ஆனாலும்
சாலைகளில் பேருந்து நிறுத்தத்தில்
அலுவலகத்தில் ரயில் நிலையத்தில் எனக்
கரையில் நாம் நிற்கும்போதே
பிறந்தோடிக்கொண்டிருக்கும் நதியைப் போல
அனைவரும் ஓடிக்கொண்டிருக்கிறோம்
அவரவர்க்கான கடலைத் தேடி..!!
எல்லாப் பேருந்துகளும் சென்றபின்னும்
காத்திருக்கின்றனர் யாரோ சிலர்
யாருக்காகவோ காத்திருந்தபடி..
நம் எல்லோருக்கான பேருந்துகளும்
எப்போதும் ஒன்றாகவே வருவதில்லை.
ஆனாலும் அவரவர்க்கான பேருந்துகள் மட்டும்
தாமதமாகவே வருகின்றன எல்லோருக்கும்...!
இருந்தாலும் காத்திருக்கிறோம்
இதுவரை வந்திருக்காத
எல்லோருக்குமான பேருந்திற்காக
எல்லோரும்...!!