உனக்காக...

உன்னிடத்தில்
சொல்லிய வார்த்தைகளை விட
சொல்லாத வார்த்தைகள்
அதிகமுள்ளன என்னிடத்தில்.

சொல்ல வந்து முடியாமல் விட்ட
அவையாவும்
சேர்த்து வைக்கப்பட்டுள்ளன
பழைய அஞ்சல்தலைகள் போல.

காலம் கடக்க கடக்க
அவற்றின் மதிப்பும்
கூடிக்கொண்டே செல்கிறது.
மீண்டும் மீண்டும் அவை நினைவுபடுத்துகின்றன
பேசாமல் விட்ட துக்கத்தின் வலியை.

சேர்த்து வைத்த எல்லா சொற்களும்
ஆழ்மனதின் ஓரத்தில் ஓர் அறையில்
வீழ்ந்துகிடக்கின்றன
வீசி எறியப்பட்ட
வாழைப்பழத் தோல் போல.

என்றாவது ஒருநாள்
அவ்வறை திறக்கப் படலாம்.
சேர்த்து வைத்த வார்த்தை யாவும்
உன்னைத் தேடி வரலாம்.
அந்த நிமிடம் நான்
இறந்தும் கூட இருக்கலாம்..!!